Satbara on Whatsapp: शेतकऱ्यांसाठी आनंदाची बातमी! सातबारा, जमीन दस्तऐवज आता व्हॉट्सअँप वर मिळणार!

मुंबई / कृषी वार्ता न्यूज: महाराष्ट्रातील शेतकरी आणि जमीन मालकांसाठी एक मोठी आणि स्वागतार्ह सुविधा लवकरच सुरू होत आहे. भूमी अभिलेख विभागाने डिजिटल तंत्रज्ञानाचा वापर करत शेतकऱ्यांसाठी सातबारा, ८ अ उतारा, फेरफार नोंदी आणि ई-रेकॉर्ड यांसारखी महत्त्वाची कागदपत्रे थेट व्हॉट्सअँप वर (Satbara on Whatsapp) उपलब्ध करून देण्याची योजना आखली आहे. ही सुविधा शेतकऱ्यांचा वेळ, पैसा आणि श्रम वाचवणारी ठरणार आहे. यामुळे स्थानिक सेतू केंद्रे किंवा महा-ई सेवा केंद्रांवर जाऊन जादा पैसे खर्च करण्याची गरज संपुष्टात येणार आहे. ही प्रक्रिया पूर्णपणे पारदर्शक, स्वस्त आणि स्मार्टफोनद्वारे सहज उपलब्ध होणारी आहे.

पूर्वी सातबारा उतारा मिळवण्यासाठी शेतकऱ्यांना स्थानिक सेतू केंद्रांवर किंवा तलाठी कार्यालयात जावे लागायचे. शासनाने यासाठी फक्त १५ रुपये शुल्क निश्चित केले असले, तरी प्रत्यक्षात अनेक ठिकाणी जास्त पैसे आकारले जायचे. शिवाय, उतारा संगणकावर डाउनलोड करून पेनड्राइव्हद्वारे घ्यावा लागायचा, ज्यामुळे तांत्रिक अडचणी आणि माहितीच्या गैरवापराचा धोका निर्माण होत होता. या नव्या योजनेमुळे शेतकऱ्यांना फक्त त्यांचा मोबाइल क्रमांक नोंदवून सातबारा आणि इतर दस्तऐवज थेट व्हॉट्सअँप वर मिळणार आहेत.

Satbara on Whatsapp: ही सुविधा कशी वापरायची?

या सुविधेचा लाभ घेण्यासाठी शेतकऱ्यांना आणि जमीन मालकांना महाराष्ट्र शासनाच्या अधिकृत ‘महाभूमी’ संकेतस्थळावर (bhulekh.mahabhumi.gov.in) भेट द्यावी लागेल. तिथे स्वतःचा मोबाइल क्रमांक आणि जमिनीच्या मालकीचा तपशील (जसे की खाते क्रमांक, गाव, तालुका, जिल्हा) भरून नोंदणी करावी लागेल. ही नोंदणी अवघ्या ५० रुपयांच्या नाममात्र शुल्कात पूर्ण होईल. नोंदणी झाल्यावर, शेतकरी व्हॉट्सअॅपद्वारे आपल्याला हवे असलेले दस्तऐवज मागवू शकतील. ही सेवा तीन मुख्य स्तरांवर कार्य करेल:

1. माहिती: यामध्ये शेतकऱ्यांना भूमी अभिलेखाशी संबंधित कायदे, प्रक्रिया, फेरफार कसे करावे, कोणत्या कागदपत्रांचा कशासाठी उपयोग होतो याची माहिती प्रश्नोत्तर स्वरूपात मिळेल. ही माहिती त्वरित आणि सहज समजेल अशा पद्धतीने उपलब्ध असेल.
2. सुविधा: सातबारा, ८ अ उतारा, फेरफार नोंदी आणि ई-रेकॉर्ड यांसारखी कागदपत्रे थेट व्हॉट्सअॅपवर डाउनलोड करता येतील. यामुळे कार्यालयात रांगा लावण्याची गरज नाही, आणि शेतकऱ्यांचा वेळ आणि पैसा दोन्ही वाचेल.
3. सूचना: जमिनीच्या नोंदवहीत कोणताही बदल झाल्यास (उदा., फेरफार), त्याची माहिती थेट जमीन मालकाच्या व्हॉट्सअँप वर पाठवली जाईल. यामुळे शेतकरी स्वतः आपल्या जमिनीच्या नोंदींवर लक्ष ठेवू शकतील, आणि कोणत्याही तृतीय पक्षाची किंवा एजंटची गरज भासणार नाही.

Best Medical Plant: निरोगी आरोग्यासाठी घरगुती खजिना: या ५ औषधीय वनस्पती ठेवतील तुम्हाला निरोगी

सेवेची सुरुवात कधी?

ही सेवा प्रायोगिक तत्त्वावर १५ जुलै २०२५ पासून सुरू होईल आणि १ ऑगस्ट २०२५ पासून ती संपूर्ण महाराष्ट्रात सर्वसामान्यांसाठी उपलब्ध होईल. ही सुविधा डिजिटल इंडिया अभियानाला चालना देणारी आहे. यामुळे शासकीय प्रक्रियांमध्ये पारदर्शकता वाढेल, भ्रष्टाचाराला आळा बसेल आणि ग्रामीण भागातील शेतकऱ्यांचे तांत्रिक सक्षमीकरण होईल. प्रभारी अतिरिक्त जमाबंदी आयुक्त सरिता नरके यांनी या योजनेची माहिती देताना सांगितले की, ही सेवा लाखो शेतकऱ्यांना त्यांच्या हक्काची कागदपत्रे वेळेवर आणि विश्वासार्हपणे मिळवून देईल.

योजनेचे फायदे

Satbara on Whatsapp योजनेमुळे शेतकऱ्यांना आता सेतू केंद्रांवर अवलंबून राहावे लागणार नाही. तसेच, माहितीच्या गैरवापराचा धोका कमी होईल, आणि प्रत्येक शेतकरी आपल्या जमिनीच्या नोंदी स्वतः तपासू शकेल. ही सुविधा शेतकऱ्यांना स्वावलंबी बनवेल आणि शासकीय यंत्रणेशी थेट जोडेल. यामुळे ग्रामीण भागातील नागरिकांचा शासनावरील विश्वासही वाढेल.

ही योजना महाराष्ट्रातील शेतकऱ्यांसाठी खऱ्या अर्थाने क्रांतिकारी ठरणार आहे. व्हॉट्सअँप सारख्या सुलभ आणि सर्वांना परिचित असलेल्या माध्यमाचा वापर करून शासनाने शेतकऱ्यांचे जीवन अधिक सुलभ आणि तणावमुक्त करण्याचा प्रयत्न केला आहे.