शेकटा / कृषी वार्ता न्यूज: छत्रपती संभाजीनगर जिल्ह्यातील शेकटा गावचा तरुण संदीप दाभाडे याने स्वप्नांना मेहनतीची जोड देत स्वतःचा व्यवसाय उभा केला आहे. आजच्या तरुणाईला प्रेरणा देणारी त्याची ही कहाणी आहे. संदीपने पारंपरिक नोकरीच्या बंधनात न अडकता स्वतःच्या गावात पोल्ट्री फार्म सुरू करून यशाचा (Poltry Farm Success Story) एक नवा मार्ग निर्माण केला.
Poltry Farm Success Story: संदीप दाभाडे यांची प्रेरणादायी यशोगाथा
संदीप याने पुणे विद्यापीठातून मानव संसाधन (एचआर) मध्ये एमबीए पूर्ण केले. शिक्षणानंतर त्याला एका मोठ्या कंपनीत चांगल्या हुद्द्यावर आणि लाख रुपये पगाराची नोकरी मिळाली. पण त्याच्या मनात काहीतरी वेगळं करण्याची इच्छा होती. दुसऱ्याच्या हाताखाली काम करण्यापेक्षा स्वतःचा मालक बनण्याचं स्वप्न त्याने पाहिलं. या विचारातून त्याने नोकरी सोडून गावात कुक्कुटपालनाचा व्यवसाय सुरू करण्याचा धाडसी निर्णय घेतला.
संदीपने केवळ स्वप्न पाहिलं नाही, तर त्यासाठी कसोशीने नियोजन केलं. त्याने शेकटा गावातच एक आधुनिक पोल्ट्री शेड उभारला. गावरान कोंबड्यांचे संगोपन करण्याचा निर्णय त्याने घेतला, कारण या जातीच्या पक्ष्यांना बाजारात नेहमीच मागणी असते. त्यांचं मांस आणि अंडी पौष्टिक मानली जातात. संदीपने सुमारे पाच हजार गावरान कोंबड्यांचा व्यवसाय सुरू केला. त्याच्या व्यवसायाची सुरुवात भक्कम झाली आणि आता तो दर तीन महिन्यांनी पक्ष्यांची विक्री करून चांगलं उत्पन्न मिळवतो. याशिवाय अंड्यांचीही नियमित विक्री होते. सर्व खर्च वजा जाता त्याला दरमहा ४० ते ५० हजार रुपये निव्वळ नफा मिळतो. म्हणजेच वर्षाला सुमारे ५ ते ६ लाख रुपये त्याची कमाई होते. ही रक्कम त्याच्या मागील नोकरीच्या पगारापेक्षा कमी असली, तरी स्वतःचा मालक असण्याचा आनंद आणि समाधान त्याला अधिक मोलाचं वाटतं.
संदीपने आपल्या व्यवसायात खर्च कमी ठेवण्यासाठी आणि पक्ष्यांचं आरोग्य राखण्यासाठी विशेष काळजी घेतली आहे. पक्ष्यांसाठी लागणारं अन्न त्याने स्वतः बनवायला सुरुवात केली. यात अर्धं अन्न घरगुती पद्धतीने तयार होतं, तर उरलेलं अन्न स्थानिक भाजीपाल्याच्या बाजारातून मिळतं. यामुळे खर्च कमी होतो आणि पक्ष्यांचं आरोग्यही उत्तम राहतं. त्याच्या या नियोजनामुळे व्यवसायात सातत्याने वाढ होत आहे. आता छत्रपती संभाजीनगर जिल्ह्यातील अनेक व्यापारी आणि शेतकरी थेट त्याच्याकडे पक्षी खरेदीसाठी येतात. स्थानिक ग्राहकांची मागणी लक्षात घेऊन संदीप अंडी आणि कोंबड्यांची थेट विक्रीही करतो. यामुळे त्याचा व्यवसाय अधिक विस्तारत आहे.
संदीपची ही यशोगाथा केवळ त्याच्यासाठीच नव्हे, तर गावातील इतर तरुणांसाठीही प्रेरणादायी आहे. नोकरीच्या मागे न धावता स्वतःचा व्यवसाय उभा करण्याचं धाडस आणि मेहनत कशी फळाला येते, याचं संदीपचं उदाहरण आहे. त्याच्या या यशामुळे शेकटा गावातही कुक्कुटपालनाच्या व्यवसायाकडे तरुणांचा ओढा वाढू लागला आहे.
2 thoughts on “Poltry Farm Success Story: तरुणाने सोडली 1 लाखाची नोकरी, गावात उभा केला स्वत:चा पोल्ट्री फार्म!”